កំពត៖ ក្រុមអ្នកបច្ចេកទេសរបស់ក្រុមហ៊ុនស៊ីណូហាយដ្រូអាចនឹងបើកទឹកបង្ហូរចេញពីអាងទំនប់វារីអគ្គិសនីកំចាយក្នុងករណីបើភ្លៀងនៅតែបន្តធ្លាក់។
យោងតាមលិខិតជូនដំណឹងចុះថ្ងៃទី១៩ ខែកក្កដា ឆ្នាំ២០២៤ របស់រដ្ឋបាលខេត្តកំពតមានខ្លឹមសារថា គណៈកម្មាធិការគ្រប់គ្រងគ្រោះមហន្តរាយខេត្តជម្រាបជូនដំណឹងដល់សាធារណជនឱ្យបានជ្រាបថា ដោយសារភ្លៀងបានធ្លាក់រយៈពេលប៉ុន្មានថ្ងៃជាប់ៗគ្នា ពិសេសនៅតំបន់ស្ថានីយវារីអគ្គិសនីកំចាយធ្វើឱ្យកម្រិតទឹកក្នុងអាងស្តុកកើនឡើងជាបន្តបន្ទាប់។ នៅពេលកម្រិតទឹកកើនដល់កម្ពស់១៤៨ម៉ែត្រ ក្រុមការងារបច្ចេកទេសនឹងបើកទ្វាររំដោះទឹកចេញពីអាងទំនប់វារីអគ្គិសនីកំចាយដោយសន្សឹមៗ។
សូមបញ្ជាក់ថា គិតត្រឹមវេលាម៉ោង៨យប់ថ្ងៃទី១៩ ខែកក្កដា ឆ្នាំ២០២៤ កម្ពស់ទឹកក្នុងអាងស្តុកនៃទំនប់វារីអគ្គិសនីកំចាយបានឡើងដល់១៤៧,៥៨ម៉ែត្រ ដោយលម្ហូរចូលមានចំណុះ២៦៥,៨០ម៉ែត្រត្រីគុណក្នុងមួយវិនាទី៕
